Kagame, perezida w'u Rwanda avuga ko yatowe n'Abanyarwanda 95.05%. Abo Banyarwanda avuga bamutoye, ubu abageze ku buce. Kuva yatera u Rwanda muri 1990, abo Banyarwanda yitwaza, ntiyigeze abaha amahoro. Abaturage bo muturere twa Byumba, aho intambara yatangiriye, kimwe n'abandi Banyarwanda mu gihugu hose,  bazi ubwicanyi bw'uwo mutegetsi afatanyije n'inkotanyi(FPR) ayobora. Ubu kuva mu 1996 igihe acyura abanyarwanda ku ngufu, agatikiza abarenze ibihumbi maganabiri(200.000) abiciye muri Congo; agateza intambara muri icyo gihugu mu mwaka wa 1998, byatumye Abanyekongo (Les Congolais) nabo bamenya politike ye y'ubugome, ubwicanyi, ubusahuzi, ikinyoma n'amacabiranya.

Abanyarwanda ntabwo ari abana. Bamaze guca akanguhe muri politiki. Gukomeza kubeshya amahanga ngo Abanyarwanda bafite "ingegabitekerezo ya jenoside" ni ikinyoma gihanitse. Ubwo nari mu Rwanda kuva kw'itariki ya 20 y'ukwezi kwa gatandatu(Kamena) ku geza mu kwa cumi na kumwe(Ugushyingo), umwaka 2003,  naratutswe ku ma Radiyo, Abanyapolitike barimo uwitwa Kagabo wiyita umunyabwenge, bavuga ko ndi "umuhutu w'umwicanyi", uwitwa Nsengimana Yozefu wahoze ari PL-power na we yavuze kuri Radiyo na Televiziyo by'u Rwanda ko "mfite ingengabitekerezo ya jenoside". Ibyo yabivuganye ubukana budasanzwe kandi azi neza ko ibyo avuga ari ikinyoma n'amacabiranya. Imyitwarire nk'iyo yerekana ko beneyo baba bihakirwa k'ubutegetsi bushingiye kw'iterabwoba, n'ubwicanyi.

Imbere y'amahanga, ubwo butegetsi bwa Kagame bwitwaza jenoside kugira ngo bukomeze ingengabitekerezo yabwo, y'ubugome n'ubwicanyi, ishingiye ku matwara ya "Apartheid".

Ninde watinyuka kuvuga ko "Faustini TWAGIRAMUNGU" afite ingengabitekerezo ya jenoside? Hari umuhutu, umutwa, cyanga umututsi, ndetse n'umunyamahanga wamurushije kurwanira uburinganire bw'Abanyarwanda mu gihugu cyabo? Ibyamvunzweho by'ikinyoma, ubu nibyo bivugwa ku banyarwanda bose badashaka ingoma ya Kagame ifite ingengabitekerezo ya"Apartheid".

Politike ya KAGAME n'udutsiko twe ibaye politike isa na yayindi y'Abazungu ba gashakabuhake bafunze Nelson Mandela imyaka 28 bamuziza ko ngo avugira bene wabo b'abirabura bari baravukijwe uburenganzira mu gihugu cyabo.

Politike ya KAGAME, ni politike ya "APARTHEID YOROSHE IKINYOMA".Abanyarwanda  icyo bashaka ni ukuvugisha ukuri. Ntabwo uwo mu perezida azakomeza guteza imbere politike ye yo kuvangura abana b'Abanyarwanda bakomoka mu miryango y'Abahutu, maze ngo twese dukomeze turebere gusa kandi duceceke; ngo ejo batavuga ko dufite "ingengabitekerezo ya jenoside".