1. Ibuririro

2. Guskashaka ubutegetsi burambye

3. Kuburiramo ko "kwibohoza"

3.1 Ubutegetsi bubuze icyizere

3.2 Amahanga yashutswe

3.3 Ubutegetsi bwizamura kandi bw'igitugu

3.4 Ubutegetsi butazirikana abaturage

3.5 Intambara ififitse yo kurwanya ubukene

3.6 politiki "mparaniragihugu" itagiye umujya umwe

4. Ibyo nemera n'ibyo nkesha politiki zabanje

4.1 Perezida w'Ishyaka M.D.R. na Ministri w'Intebe

4.2 Amasomo navanye mu kuzirikana ku buzima bwanjye

4.3 Kurandura burundu umuco wo kudahana no kugarura

5. Ibyo nemera muri politiki

5.1 Kudapfukirana abahutu n'abatutsi

5.2 Kurwanisha ibitekerezo

5.3 Gutegeka ku bundi buryo ( Guhindura imitegekere)

6. Ikinteye guhagurukira politiki

6.1 Guhindura imiyoborere ikagira ireme

6.2 Porogaramu ya politiki ikomatanya

6.3 Guhanya uburenganzira bwo kwishyira hamwe no

kuvuga icyo umuntu atekereza

6.4 Gusimburana mu butegetsi n'uruhare rw'amahanga

7. Ibyerekezo n'inzira yanyurwamo mu kuzahura u Rwanda

8. Umwanzuro.

Ibigamijwe bizajya mu mateka. Nyuma y'itsembabwoko mu Rwanda ryo muri 1994 n'amakuba abantu babayemo ari mu gihugu ari no hanze yacyo, nyuma y'Inzibacyuho ikabakaba imyaka icumi, ayo matora ntiyagombye guhita gutyo gusa adahawe agaciro akwiye.

Ndumva ngomba kwitaba Abanyarwandakazi n'Abanyarwanda bazi intambara yanjye ya politiki mu Rwanda, no ku buryo rusange abakunda Domokarasi, ukwishyira ukizana kandi bifuza ihinduka rya politiki n'imiyoborere y'igihugu, nizo mpamvu zinteye kwiyamamaza muri ayo matora. Nishoye ku bwende bwanje, nkaba nterwa imbaraga n'uko niyemeje gutunganya uwo murimo w'ubukunda-gihugu no gukorera igihugu cyanjjye nkunda.

Nyuma y'imyaka irindwi nitoza ibya politiki mu mahanga, igihe kirageze cyo kugaragara mu rubuga rwa politiki y'Igihugu.

Ariya matora azagaragaza icyerekezo cy'imibereho y'abaturage bacu bifuza kubaho mu mahoro no mu mutekano hamwe n'abaturanyi babo kandi bakabaho mu mutuzo bishyira bizana bashingiye ku burenganzira-nshingiro. Abaturanyi bacu b'Abanyekongo, Abarundi, Abaganda, Abanyatanzaniya, n'amahanga muri rusange, barashima ubutegetsi buriho kuba bwaragize igitekerezo cyo kuyategura. Bose barifuza ko yaba mu mutuzo kandi akarangwa n'ukuri n'ubwisanzure.

Muri iyi nyandiko ndiyereka abaturage bacu kandi nkagerageza kubumvisha intego yanjye y'ubumwe bw'Abanyarwanda kandi nkabasaba kuntera inkunga kugira ngo twese hamwe dushobore gusana no guteza imbere igihugu cyacu cyiza.

Nintorwa, nziyemeza kugarura ubutegetsi bwa demokarasi mu gihugu cyanjye no kugarura ubusabane bwuje amahoro mu karere k'Ibiyaga Bigari.

Byongeye kandi nshingiye ku bumenyi nkesha imirimo ya politiki, mfite ubushobozi bwo kubonera umuti mu mutuzo ibibazo by'amoko, n'ibindi by'inyungu rusange mu bice binyuranye by'Ubukungu n'imiterere ya politiki y'Igihugu.

Isubiranamo ry'abaturage kandi rigamije kwigarurira abandi, ubukene, indwara, ruswa, kubura uburenganzira bwo kwishyira ukizana bya buri muntu, ubwoba, kuramya umuntu, ubutegetsi bw'agatsiko bugizwe n'"akazu" bwagarutse, bizarwanywa mu gihe nzaba niyamamariza aya matora kandi, nimara gutorwa, ibyemezo bikomeye bizafatwa kugira ngo biveho burundu.

Muri iyi nyandiko ndiyamamaza nk'umukandida ushaka ihinduka ry'ibintu, umukandida ushaka ihinduka ry'imitekerereze, n'uw'icyizere. Kurwanya ingeso yo kudahana, kugarura demokarasi mu gihugu cyanjye no gushyiraho ingufu zanjye zose mu gutsura amajyambere yacyo agiye umujya umwe mu bice by'ubukungu n'imibereho myiza, hubahirizwa Inzego z'Ubutegesi zihamye kandi bishingiye ku bushake bw'Abanyarwanda : niyo ntego yanjye.

Mu bihe bishize, Abanyarwanda bazirikanye ku buryo bucukumbuye uko ibintu byifashe mu bya politiki n'imibereho myiza, mu by'amateka, mu by'ubukungu n'iby'umuco w'igihugu cyabo, basesengura iby'ubutegetsi bwa cyami n'ubwa Repubulika byagisimburanye mo.

Bazirikanye kurushaho ku kibazo cy'u Rwanda rw'ejo, cyane nyuma y'itsembabwoko mu Rwanda ryo muri 1994, n'ibindi byaha byibasiye inyoko-muntu, kimwe n'ibikorwa by'itsembabwoko byakorewe impunzi z'abanyarwanda n'abaturage ba Repubulika Iharanira Demokarasi ya Kongo, yasahuwe ubukungu bwayo mu gushaka guhanya politiki ya mpatsibihugu mu karere y'Ubutegetsi buriho i Kigali.

Muri ibyo bitekerezo byose, umwanzuro wavuyemo n'uko babeshywe, gushidikanya ku bihe biri imbere, kutizera ubutegetsi buhora mu ntambara. Iyo bareba imiterere y'ibyo bibazo, Abanyarwanda bibaza bucece ibibazo bitabonerwa ibisubizo. Barashaka abayobozi baberekera ibibategereje birushijeho kuba byiza kandi bakabaha icyizere cyo kubaho mu mahoro arambye mu gihugu cyabo.

Uko ibintu biteye ubu, amahanga yagombye kubona uko ibintu biteye, akavana isomo mu marorerwa aherutse, agahitamo ku buryo bugaragara kandi buboneye hagati y'inzira ebyiri : Demokarasi cyangwa Ubutegetsi bw'igitugu.

Kubera ubushobozi buke, abo baturage bibwira ko ibyo basaba bikwiye igisubizo kibaha amizero, kinyuze mu guhindura ibintu mu nzira ya demokarasi n'amatwara mashya ya politiki. Uko biri kose, abo baturage nibo bagomba kugira icyo bakora, bakagikora ku buryo buboneye, atari ku nyungu z'igihugu cyabo gusa, ariko ari no ku nyungu z'abo basangiye imibereho bose kugira ngo babonere hamwe ibisubizo bikwiranye n'imiterere ya politiki ari mu gihugu imbere, ari mu karere, ari no muri rusange.

Iryo hinduka ntiryoroshye, igihe umwuka wa politiki y'ubu werekana ibirere byijimye mu Rwanda, ngo rwabohowe, ariko ni ngombwa.

Imvugo, akenshi itaboneye, kandi yivuguruza, y'abashinzwe kugena aho baganisha abanyarwanda, igamije guhindura amateka yabo. Nta murage nyawo (repères) washingirwaho mu gushinga ibirindiro mu gihugu cyacu. Kuri bo byose ni"itsembabwoko". Abayobozi bose ba Repubulika, uretse Perezida uriho, Generari Major Paur Kagame, ntibabikwiye kandi ni abicanyi. Kuri bo, nta mateka akiriho uretse ayabo. Ibyo rero ntawabyemera. Iyo mvugo rero, akenshi, isesereza, yuzuye agasuzuguro, ku bigaragaza muri rusange ibyabaye ku Banyarwanda, ndetse n'uko amahanga abibona, ihisha uburyo budashobotse abantu bariho ubu ngubu kandi igatatira bikomeye ibihe bizaza, bitagira icyizere kuva FPR yagera ku butegetsi.

Ibohorwa ry'u Rwanda ryaririmbwe n’'’abitwaza gukunda igihugu" ba FPR ntiryabaye, risigaye ku "ntero gusa" idahuje n'uko ibintu biteye. Nyuma y'iryo "bohorwa", abanyarwanda baratsembatsembwe batagira kivurira, bitswa n'inzara, bahunga igihugu cyabo umusubizo. Muri abo bajya hanze muri iyi myaka ya nyuma, harimo abashoramari mu bukungu bw'igihugu, bananijwe n'uburemere bw'amahoro n'imisoro badashoboye kwihanganira, bakirukankira mu bindi bihugu nka Marawi, Zambiya, Mozambiki, Angora ndetse na Madagaskari bashakayo umunezero: iryo ni "ihunga ry'imari y'igihugu". Ni intambara y'ubuzima igihugu cyabo kidagishoboye kubaha. Ni ishyano rwose ! Icyizere cyari cyashyizwe mu mitwe y' abatutsi bari mu mahanga n'abari mu gihugu n'abahutu bakunda demokarasi bakunze kwita "modérés", mu gihe cy'itsinda rya FPR ryo mu minsi yashize, cyasimbuwe buhoro buhoro no kuzeyuka, gushidikanya no kwivumbura bucece muri iki gihe.

Inzira yo guhanya demokarasi yatangiye muri 1990, imishyikirano yakurikiye intambara, ishingiye kw'igabana ry'ubutegetsi hagati ya Reta y'u Rwanda na FPR, Itegeko-ngenga ryavuyemo, izo ntango z'amahoro arambye ubu zarasibanganijwe n'urwitwazo rushiturana, ko "hahagaritswe Itsembabwoko".

Nacitse kw'icumu, nkurikiranywe n'ubwo bugome, sinumva ukuntu ubwo bugome bwakomeza kuba urwitwazo rwo gusobanura amarorerwa, ukwirengagiza, n'ubundi bushobozi buke butihishira, bwagaragaye mu byakozwe ubu na FPR.

Abaturage b'u Rwanda babeshywe na FPR. Yari yabijeje demokarasi, yahereyeko ihindukamo ubutegetsi bw'igitugu. Umuco wa demokarasi, washingiweho mu guca ingoma ya cyami n'ishyirwaho rya Repubulika, wugarijwe mu gihugu n'amategeko atumvikana, ateye nk'aya Starine, yamunzwe impande zose n'agakoko rurimbuzi k'inyungu za politiki zigayitse, iz'ibintu no gutonesha.

Ku buryo budashidikanwaho, amarangamutima yigaragaza mu mbaga y'abanyarwanda idakoma, yaganjwe n'ubwoba no gutinya kurigiswa, n'uko inzira ya demokarasi yatangiye muri 1990 yemewe ityo n'amasezerano y'Amahoro ya Arusha yo muri kanama 1993, yakamuwemo ibiyigize, yimukira imikorere ya FPR. Ikaba yihishe inyuma y'Impuzamashyaka "FORUM des PARTIS", ubutegetsi buriho ubu i Kigali burashaka kuyishyira mu Itegeko-nshinga kugira bibuze uburyo bwose bwo kwishyira hamwe no gutangaza ibitekerezo bya politiki byaba bitayinyuzemo.

Biragaragara ko ihinduka ryifujwe cyane na rubanda kuva miri 1990 itazavanywaho n'amacenga yireba gusa, bitongeye na none gushyira mu byago ibihe bizaza by'Abanyarwanda. Iyo mikorere ihuza byose hamwe, yashaje muri iki gihe, yashyizweho ku gahato habanje gukorwa ubugome bwacecetswe, bwuzuye ingaruka ziremereye. Ni ngombwa ko abantu babona ibyo izahitana mu bihe biri imbere bya kure, keretse rero abantu bemeranijwe ko inzira ya demokarasi muri politiki y'igihugu ari ngombwa. Iyo nzira isaba ubutwari, yewe ndetse no kwigomwa ku bari ku butegetsi muri iki gihe, ariko mu by'ukuri niyo igize umuti yonyine w'imibabaro y'igihugu cyacu.

Abanyarwanda barashaka kwipakurura uburyo bwijimye bashyizweho ku ngufu n'ubutegetsi bwavuye mu miyonga y'imvururu bitari mw'ipiganwa mu mahoro. Barashaka uburenganzira bwo kuvuga icyo batekereza, uburenganzira bwo kwinjira mu ishyaka rya politiki bihitiyemo, uburenganzira bwo gukora ibyo batekereje, bwo kwishyira bakizana, bw'ibitekerezo bwite. Mu yandi magambo, barashaka ibikubiye mu Itegeko-Nshingiro, aribyo gushyiraho uburenganzira bunyuze mu nzira ya demokarasi no kwipakurura burundu ishyaka rimwe rukumbi, n'iyo ryaba ryiyoberanije cyangwa ryipfuritse.

Ikibazo cy'ibanze ubu ngubu si icyo kumenya, ko ari yego cyangwa oya, ko habaye itsembabwoko mu Rwanda, isubiranamo ry'abaturage, itsembatsembana ry'amoko cyangwa se intambara ya FPR irwanya Kongo yitwaje ko irwanyayo abakoze itsembatsemba. Abanyarwanda bazira ibyo bibi byose bafite inshingano yo kwizera ibihe biri imbere birushijeho kuba byiza, yo gutegereza ibisubizo nyabyo ku mibabaro yabo inyuranye. Barashaka kubivamo vuba kandi bemye.

Kuva ubu rero ikibazo cy'ibanze kigomba kwigwa ni uguhamya ibyemejwe n'inzira ya demokarasi no kumenya niba imikorere y'uburyo bwa politiki kandi bushingiye ku nzego z'igihugu, imitunganyirize n'imivugururire y'ibya politiki, iby'imibereho byiza n'iby'ubukungu bihuje n'amahame remezo y'imicungire mu nzira ya demokarasi, byifujwe cyane n'abanyarwanda, hubahirijwe inshingano n'uburenganzira bya buri muturage nk'uko byahamijwe n'ibyemezo byo mu gihugu cyangwa mu rwego mpuzamahanga byo kurengera uburenganzira bw'ikiremwa muntu.

Ku bwanjyye mbona ko ibyakozwe byose mu Rwanda, kuva 1994, bitashoboye kugerwaho n'ubutegetsi buriho ubu, hatabayeho umusanzu, kungurwa ibitekerezo cyangwa se ukwivanga kutigaragaza kw'ibihugu by'amahanga. Nyamara aya mahanga ntiyigeze ahangayikishwa no gusaba bimazeyo, mu gihe nyacyo, ko abafite ubwo butegetsi bagendera mu nzira ya demokarasi, cyangwa ko bagaragariza rubanda ibyo bakora. Igihugu kiyoborwa nk'umutungo bwite wa Perezida wa Repubulika ushyiraho kandi agakuraho ba minisitiri, abadepite, abayobozi b'intara n'abandi bakozi bakuru ba Reta, uko abyishakiye. Uko ibintu biteye ntawabyemera. Ni ngobwa rwose ko habaho ihinduka mu nzira ya demokarasi n'uburyo bwo kuyobora igihugu bugahinduka.

Nta kwibeshya : ugucengera kw'ibihugu by'amahanga bigendera ku matwara ya demokarasi, byifashisha muri ibi bihe ubuyobozi bufite ingufu za gisirikari, ariko zitanogeye abaturage, muri aka karere kugira ngo barengere inyungu zabo mu karere k'Ibiyaga Bigari. Ibyo bihugu ubwabyo bifunga amaso iyo demokarasi inyonzwe, ihinduriwe isura, igatana, biturutse ku kutihanganirana, kwegezayo abandi, iterabwoba no kutita nkana kenshi ku burenganzira bw'ikiremwa muntu.

Si njye njyenyine ubona uko kwirengagiza. Mbihuriyeho n'abanyarwanda, n'Abanyekongo, n'Abarundi, batumva icyerekezo cy'inkunga ibihugu bimwe bigendera ku matwara ya demokarasi biha buriya butegetsi bw'igitugu kandi bw'agatsiko. Ibyerekezo by'inzira ya demokarasi bicirwamo buri gihe n'ibintu bibonwa na bose ( mu Rwanda muri 1990, mu Burundi muri 1993 no muri Kongo muri 1996 no muri 1998) n'iterabwoba ry'ubutegetsi buriho.

Muri iki gihe ibihugu bikunda demokarasi, bishyigikiye ubutegetsi buriho mu Rwanda, byagombye kwiyemeza kugarura abayobozi bacyo mu nzira iboneye yo kubaha inzira ya demokarasi, aho kubashyigira mu gukomeza politiki yabo yica ibintu y'"ishyaka rimwe", bashora amafaranga mu matora afite umuco utaboneye abaturage. Bidafashe icyemezo kigaragara ku ruhande rwabo ku bibazo biriho ubu, abanyarwanda bazahera ku ngoyi y'agatsiko kanezerewe, kizeye kuguma ku butegetsi barengera inyungu z'ibihugu bikomeye, bibangamiye abanyarwanda.

Hagomba gushyirwaho igitugu kugira ngo uko gutana riteye ibyago rikorwa ubu, rigamije kuduha ku ngufu demokarasi y'igice binyujijwe mu Itegeko nshinga ryikorewe n'abari ku butegetsi ubungubu, rihagarara. Ntawe uyobewe ko kujarajara mu nzira ya demokarasi n'inzego z'ubutegetsi nta handi byatujyana uretse kukomeza gupfundikira abantu bizakurikirwa n'ingaruka zinyuranye.

Umuntu yakumva ate ibyo bagayaga MRND, ishyaka rimwe ryariho muri 1990, niba ubungubu bahishiriye ibigayitse byagomba kubwirwa FPR, ishyaka rimwe naryo ku buryo bwaryo, kubera uburyo bukaze burangwa na demukarasi nkeya ikoresha ihanganye n'abaturage kugira ngo igume ku butegetsi.

Benshi bazavuga batibeshya ko ubutegetsi bwa FPR burusha ububi ubwa MRND. Nanjye ubwanjye ndabyemera kandi ndahamya ndanguruye ijwi ibyo abandi banyarwanda benshi bavuga buhoro, kuko byatumye nta icyizere cyane. Kenshi nibaza niba twaremeye, ntawe uvuyemo, ibitambo by'ubuzima bw'abantu bingana kuriya kugira ngo dukomeze kujya turara dushigakurika : kutihanganirana, ibintu bitaboneye, intambara, ubutegetsi bw'agatsiko, ubutegetsi bw'igitugu akarengane, uburyarya, iterabwoba, ubuhubutsi, guheza abandi, no gutonesha muri politiki.

Kimwe n'Abanyarwanda benshi, ndarebana agahinda uko ingoma ya cyami- Repubulika igenda ivuka, yiyubaka ku mirambo y'abahutu n'abatutsi, y'inshuti zanjye, y'abavandimwe banjye n'abaturanyi banjye, kugira ngo inyungu z'agatsiko nta wundi mushinga w'ibanze, uretse uwo kurimbura abahinyura ubutegetsi bwayo.

Gushaka gushyiraho ubutegetsi busumba abandi bukomeye, gushaka kwinjiza mu bandi imitekerereze ya politiki idahwitse, kuko ari iy'igitugu, hitwaje ko hahagaritswe itsembabwoko (ariko kandi ku buhe buryo !), gushaka cyane kubikora ubu urebye umwuka uriho igihe tugamije twese ihinduka rya politiki isa n'iya Starini bigaragara, ikagana politiki ikurikira inzira ya demokarasi, ntabwo byemewe na busa.

Ubukene, ubutindi, indwara, agahinda, ubwoba, gutinya kurigiswa, kudindira mu majyambere bikwiriye kuri bose si inenge idakira, si n'ibyatugwiririye, cyangwa se umuvumo ku baturage bacu. Ibyo twavana ku myaka ya 1970 na 1980, imyaka y'ikuzo mu burumbuke bwacu, byerekana ku buryo buhagije ukuntu abanyarwanda ari abakozi kandi bafite ubuhanga bwo gukora kandi ko bashobora kwegura umutwe baramutse bahawe amahoro n'umutekano. Ni koko igihugu cyacu ntigifite umutungo kamere wagereranywa n'uw'ibihugu bituranye, ariko umutungo kamere w'ibanze n'ubwenge, ni umwete ku murimo by'abaturage barwo.

Dushobora guha abo baturage umutuzo, kubunga burundu no kubarinda ibyonyi birwanira imyanya kandi bikarangiriza intambara yabyo mu muvu w'amaraso ?

Yego, ndabona igisubizo kimwe gusa : kubahiriza ubutabera, no gusubiza ubutegetsi bene bwo aribo abaturage b'u Rwanda.

Ikindi gisubizo kiri mu ntambara yo kurwanya ubukene. Imibare itangwa n'ibarura yerekana, ariko akenshi ku buryo bukabya, amajyambere yagezweho n'ubutegetsi buriho. Ikigereranyo cy'ubwiyongere bw'ubukungu kiri hejuru, kirenga kenshi 8%! Iyo mibare ikozwe ku buryo bwikinira iri ukwayo n'uko ibintu bimeze mu by'ukuri bikaba ukwabyo. Kugira ngo turwanye ubukene tugomba guteza imbere icyaro. Iyubaka ry'amazu ashashagirana sibyo biranga cyangwa ngo bibe igipimo cy'amajyambere yacu. Nahitamo kubona kiyosiki ziyongera, utuzu two gucururizamo utuntu tunyuranye, amaduka, n'amashyirahamwe aciriritse y'ubukorikori nyongerabukungu byiyongera umubare kurusha amazu abengerana n'amavatiri atabonana.

Twakwizera dute kugera ku majyambere ahanye niba umwenda wa Reta wo hanze ari 0,8% by'umusaruro wose mu gihugu muri 1990, ubu ngubu urenze 1,6 %, n'ukuvuga ko umwenda wikubye incuro 2 mu gihe cy'imyaka 10, ubwo kandi niko ubutindi mu baturage b'u Rwanda bwiyongereye, bigaragazwa na raporo y'Ishami ry'Umuryango w'abibumbye wita ku majyambere " PNUD", ku gutera imbere kw'ikiremwa muntu mu mwaka wa 2001. Urwobo rwacukuwe n'intambara yo muri 1990-1994 n'ugusenwa kwa Reta n'abarwanaga bombi (APR na FAR) ntibihagije gusobanura iryo rindindimuka ry'ubukungu.Gutagaguza umutungo wa Reta mu ntambara yo muri Kongo na ruswa ni bimwe mu byemeza iryo yongera rikabije ry'umwenda w'igihugu cyacu.

Iyo miterere irushaho gutera ubwoba iyo nta gahunda igiye inzira imwe yo kuzahura ubukungu yigeze ishyirwa mu bikorwa. Gucuruza nta mahoro ku biva hanze, (guguruza magendu) bisa n'ibishyigikiwe n'ubutegetsi, gusenya ubukungu bwa Kongo, kwegurira amasambu n'ibigo bya Reta abanyamahanga akenshi ntacyo batanze ku kiguzi cya nyirarureshwa kandi gisekeje. By'agahebuzo, mu mirimo ya Reta, gushingira ku bushobozi, ugutunganya akazi n'imyifatire byasimbujwe guhitamo kugendera kw'ihakirizwa bya politiki, bivuga kimwe no kwicungira aho imyanya ibonetse bitanga umugayo, biboneka ko umuco wo guharanira kuba indatwa ku murimo ari imihango cyangwa ibyifuzo gusa, nyamara bihozwa mu kanwa n'abategetsi bariho.

Niba politiki y'iringaniza y'ubutegetsi bwabanjirije uburiho bwaratoneshaga ibishingiye ku karere, bugaheza abatutsi mu mirimo ya Reta ku buryo buteye isoni, politiki yo gukunda igihugu y'ubutegetsi bw'ubu bwa FPR ishora igihugu mu nyenga yo guheza abandi ku buryo butigeze bubaho. Twisubiriye mu gihe cy'ubukoronize n'ingoma ya cyami bitavugirwamo. Twese turabizira : abari mu buhungiro kimwe n'abasigaye mu gihugu, bahinduwe ibiragi mu gihugu cyabo.

Mw'izina ryo gukorera mu mucyo, abayobozi bashya bafashijwe n'inzibacyuho ndende bihebuje y'imyaka 9, ntibahwemye kurunda ku banyarwanda n'amahanga amagambo y'uburondogozi ndetse na za raporo z'ibyakozwe zidasobanutse kandi zinyuranya, byavuyemo gusa gushyira umwijima ku mikorere ivangura no gushyira ku mugaragaro ubushobozi buke bikabije mu gucunga ibya rubanda. Turi abanyarwanda twese, ariko ntidufite amahirwe amwe.

None hakorwa iki? Ihinduka rya politiki ribaye ngombwa. Nta kundi byagenda. Ntirikuka. (Ir s'impose).

Mu bihe bimeze bitya, guhoza mu kanwa ushka ibitangaza, kwifatanya no kwibumbira hamwe ntibishobora gushitura abantu kubera uburemere bwo gupfukiranwa kw'imbaga y'abazira ihezwa no gushyirwa iruhande. Abanyarwanda b'ingeri zose bo mu butegetsi bwite bwa Reta barifuza kugira uruhari mu micungire y'igihugu cyabo, ariko bitari ku buryo bubonetse bwose, ariko kandi ntibashaka kuba ba "Ndiyobwana" udupira baterana cyangwa ibikoresho by'ubutegetsi.

Imbere y'ibyo byose bidahwitse, igihe kirageze cyo kugira igikorwa cya politiki, cyo guha icyizere gishya abaturage b'Abanyarwanda. Ni ngombwa kubasubiza ububasha bwabo bwuzuye kandi buhuje n'amategeko, umwanya wabo w'ibanze n'ubwigenge bwabo.

Kuva tariki ya 1 y'ukwa cyenda 1990, ninjiye mu bya politiki shyira umukono kw'ibarwa, hamwe n'abandi banyarwanda 32, ibaruwa yari igenewe Perezida wa Repubulika y'u Rwanda, imusaba gushyira mu bikorwa igitekerezo cy'amashyaka menshi cyari muri disikuru ye yo kuwa 5 Nyakanga 1990, atwemerera gushinga amashyaka ya politiki. Iyo baruwa twari twometseho itangazo ku byerekeye amashyaka menshi mu Rwanda, ntiyigeze isubizwa. Nafashe icyemezo, ibyo ntawabimpakanya, cyo gushinga mbere na mbere ishyirahamwe, hanyuma ishyaka rizaba MDR (Ishyaka riharanira demokarasi muri Repubulika).

Muri iryo shyaka niho nagaragarije ibitekerezo byanjye, n'amahame nkirwanira n'ubu. Narwanyaga ubutegetsi bw'umuntu umwe, ubutegetsi bw'igitugu mu yandi magambo, ubuhake, uguhezwa kw'abatutsi mu butegetsi, uburondakarere burenze kamere mu ngabo z'igihugu, mu burezi, no mu mirimo ya Reta ku buryo rusange, imikorere y'Akazu isimbura inzego z'ubutegetsi, hanyuma rero ruswa. Nyuma y'imyaka 17 y'ubutegetsi bw'igitugu, nashakaga ko Abanyarwanda, bahuriye mu nama y'Igihugu - Rukokoma, inama zari zigezweho icyo gihe muri Afurika ituwe n'abirabura (cyane muri Afurika y'iburengerazuba), bashobora kugaragaza ibitekerezo byabo, bagahamba burundu ibyo bapfa kandi bityo bagategura umuco mushya wa demokarasi. Umuryango wa FPR -inkotanyi wateye igihugu cyacu kuwa mbere Ukwakira 1990 bityo utatira umushinga w'Inama Rukokoma nyamara yari yayitumiwemo. Iyo nama yasimbuwe n'imishyikirano y'amahoro ya Arusha.

Kubera ko nari Perezida wa MDR kuva kuwa 31 Kanama 1992, natanzweho umukandida n'abanshyigikiye n'andi mashyaka ya politiki harimo na MRND, ku mwanya wa Minisitiri w'Intebe ugomba kuyobora Guverinoma y'Inzibacyuho ihuriweho na FPR (GTBE). Nemewe na FPR. Nyuma y'itsinda rya FPR, mbisabye bikomeye n'amahanga, kandi nanjye nifuza muri icyo gihe gukorera igihugu cyanjye, navuye mu Buburigi aho nari nahungiye kuva muri Gicurasi 1994, njya i Kigali kuyobora Guverinoma y'"ubumwe bw'Igihugu" hakurikijwe ibyari bikubiye koko mu nyuguti z'Amasezerano y'Amahoro ya Arusha. Nka Ministri w'intebe nibura kw'izina, narahiye kuwa 19 Nyakanga 1994, ubutegetsi bwigumira mu maboko y'"umuntu umwe ufite ingufu" n'ingabo. Nyuma y'ibyo natangarije rubanda bamwe babonye ibabangamiye, abandi babona inkwiranye n'igihe, nyuma y'Ubwumvikane buke buhoraho na FPR ku buryo rusange ku ngingo nyinshi, neguye mu gitondo cyo kuwa 28 Kanama 1995 nyuma y'amazi 13 zo gupfukiranwa byagendaga byiyongera.

Nasubiye mu Bubirigi aho maze inyaka 7 nitegereza. Muri icyo gihe cyose nagerageje ibishoboka byose kugira ngo abenegihungu bari mu gihugu n'abari hanze bashobore kumvikana. Nazitiwe no kutumvwa rishingiye kw'irondakoko bya bamwe muri bo.

Niba narahisemo, kuva muri Kamena 2001, kwirinda ibitangazwa mu bigezweho bya politiki y'igihugu, niba narahisemo kuba ncecetse, byatewe mbere na mbere no gucika intege, guta icyizere. Hanyuma nashakaga kuba njyenyine nkibaza, nkiha igihe cyo gusubiza amaso inyuma bikwiranye no kuzirikana mu mucyo kandi bifite inshingano.

Kuva mu mwaka wa 2001, nakomeje imibonano n'abanyapolitiki b'amahanga barimo abahagarariye rubanda mu Nteko zishinga amategeko, ba Minisitiri n'Abakuru b'ibihugu. Nasuwe n'abanyarwanda badashaka ko amazina yabo amenyekana, baturutse ahantu hanyuranye mu Rwanda, abahutu kimwe n'abatutsi, batazwi mu bya politiki, batagaragara mu binyamakuru kandi batarigera bagira ibyo batangariza kuri radiyo. Ibyo ntibibabuze kugira igitekerezo ku butegetsi buriho. Kuri bo, ibintu bikwiye guhinduka mu Rwanda, kuko igihugu cyasizwe iheruheru n'itsembatsemba n'ibyaha byibasiye inyoko muntu, nk'itsembabwoko, kiyobowe n'agatsiko, ubwirasi no gukoresha imbaraga by'ako mu gihugu no hanze bidindiza amajyambere mu bya politiki no mu by'ubukungu. Ibyo bigera ku Rwanda ariko kandi n'akarere k'Ibiyaga bigari.

Nyuma y'iyo mibonano n'Abanyarwanda ndetse n'abantu bakuru b'Abanyafurika, b'Abanyaburayi, b'Abanyamerika, nakuyemo amasomo kandi menya byinshi ku mahame ahuriweho n'abantu bose. Nzarengera iteka n'ahantu hose ubutabera, ukwishyira ukizana, ukworoherana, guhuriza hambwe ibitekerezo, ubufatanye mu bantu, uburenganzira bwo kugira amahirwe bungana kuri bose, umurimo nk'ishingiro y'ubwigenge bwite, uburezi nk'ishingiro ry'ubumenyi n'amajyambere yose, hanyuma n'urukundo rwa mugenzi wawe n'urukundo rw'igihugu.

Nzarwanya buri gihe ivangura n'irondakoko uko byaba biteye kose. Kugira ngo nshobore kurengera ayo mahame ni ngombwa kuba mu Rwanda rushya aho amahoro n'umutekano byishingirwa na Reta yubahiriza amategeko, n'inzezo z'ubutegetsi zihamye zishyizweho ku nzira ya demokarasi nyayo, itari iyishingiwe n'umuntu umwe cyangwa agatsiko. Nzubaha inzego zihamye, zikwiranya n'abaturage bacu, mbere yo kubaha abantu ku giti cyabo bakoresha iterabwoba, bambuza epfo na ruguru, bampoza ku nkeke yo kwiwa no gufungwa.

Igihe nari nkiri Minisitiri w'intebe, nahisemo kubera izo mpamvu, gukomeza kuvugisha ukuri, kubera kutagira ububasha nahabwaga n'Itegeko-Nshingiro, ryumvikanweho Arusha rigashyirwaho umukono muri Kanama 1993 nk'amasererano yumvikanweho, amasezerano yagabanijweho n'ibitangazwa mu rwego rwa gisirikari n'ubutegetsi buriho. Nari ninjiye muri Reta yiswe iy'ubumwe bw'igihugu kuko nari mfite amatwara yo kuyobora ku buryo buboneye bushoboka, yo kunga no gukubira hamwe abaturarwanda, ariko cyane cyane kuvugisha ukuri.

N'ubwo habaye itsembabwoko, nashakaga gushyira imbaraga zanjye zose mu kubaka Reta, kugarura ububasha bwayo, umutekano n'amahoro by'abaturage. Icyo nari ngamije cyari gutekereza no gushyira mu bikorwa, nta gahato no gukoresha ingufu, ibikorwa n'uburyo mboneza mikorere, bishobora guhuriza hamwe no gushora abanyarwandakazi n'abanyarwanda mu murimo wo gusana igihugu, kugarura icyizere no kurimbura ingeso yo kudahana.

Igitekerezo cyanjye kizira amakemwa ndacyacyemera n'ubu. Ariko kubura uburyo bwa politiki hakaba n'ababirwanya bakomeje badashaka kubyumva, byambujije bikomeye kubishyira mu bikorwa. Imishinga yanjye wo kurwanya umucyo wo kudahana iracyari ya yindi. Abicanyi bose ni bamwe kandi bakwiye ibihano bimwe.

Nkomeje kurwanya ibikorwa bidakwiye ikiremwa muntu kandi bigitesha umuntu agaciro birimo kwicwa urw'agashinyaguro hakoreshejwe ikiboko cyangwa inkoni kandi by'umwihariko hakoreshejwe "ingoyi" cyangwa "kandoya" (uburyo bwo kwica agashinyaguro bujyanye no kubohera amaboko imugongo y'uwicwa).

Icyo nemera mbikuye imuzi, ukuri bwanjye nyakuri ni uko Abanyarwanda bagomba kubana hamwe.

Uvuze uko ibintu biri, ntabwo hakiriho abahutu n'abatutsi nk'uko byari biri ku ngoma ya gikoronize na mbere yaho : ni ukuvuga abahutu n'abatutsi mu mibereho y'abaturage, bishyingiye ku nkomoko y'igice cy'abari mu rwego rumwe rw'imibereho cyangwa rw'umuryango.

Ubu ngubu hariho abahutu n'abatutsi bo mu buryo bwa politiki, ibice bibiri bigize igihugu akenshi bidatandukanwa n'isura, bishaka gukoresha imiterere y'ibice by'umubiri wabo, y'ibiranga buri wese, bitari ibitekerezo bya politiki kandi byubaka igihugu kugirango berekane ukuri kw'ibyo bisabira.

Ntitugomba gukoresha icyo turicyo kugira ngo duhinduke icyo tudashobora kuba ku bundi buryo. Ahubwo tugomba guhinduka icyo dushaka ko twahinduka dukoresheje ingufu ku murimo n'ubushobozi, kandi ibyo bikaba, n'ubwo duhura n'inzitizi.

Niba mbere y'imyivumbagatanyo yo muri 1959-1962, byari byoroshye gutanga igisobanuro cy'umuhutu n'umututsi ukoresheje ibimenyetso bitabesha n'ibindi bishingirwaho bigaragara kandi bizwi, ubu ngubu biraruhije kwisobanura ku bundi buryo uretse gukoresha igenekereza (criché) rya "nyamwinshi na nyamuke" byo mu mateka, byivanga na "nyamwinshi na nyamuke" byo mu bya politiki.

Ni ngombwa kwemera ko abahutu n'abatutsi bafite ibitekerezo bimwe byubaka mu nzira ya politiki, nta kibangamiye ko babana mu mahoro mu gihugu cyacu. Muri ubwo buryo, simbona ibyo baba batandu kanyeho, kandi niko ibintu bimeze ubu. Tubafashe kwibohora.

Amayobera y'abahutu-abatutsi aturuka kw' irondakoko gusa, irondakoko ridadafite aho rishingiye ku baturage basangiye byose (ururimi, imihango mu byo kubaha Imana, imigirire, imico). Ukuri kwajye ni ukurwanya iryo rondakoko, kuko ku bisobanuro by'amagambo ku gatsiko k'abaturage bafite ibyo bahuriyeho, cyangwa ubwoko bw'abantu (tribu) mu Rwanda, hari gusa ibice binyuranye by'abaturage bagize bose abaturage bamwe rukumbi b'u Rwanda.

Hari Abanyarwanda bakomeye kuri ityo tandukanyirizo kandi biyemera ko baruta abandi kubera uko gutandukanya kwashaje kw'abatutsi n'abahutu. Nemera uko babona ibintu ariko ntabisangiye nabo. Bakwiye gushyira mu gaciro iyo bashyigikira "nyamwinshi" na "nyamuke" mu by'amoko, nko muri Afurika y'epfo !

Nta kundi byagenda niba tugomba n'ibyo bishushanyo -ngereranyo (crichés) bibungwabungwa n'inzozi, amateka cyane cyane ya kironize, ugukumbbura ibya kera, ubwirasi, ubujiji ubwabwo ariko kenshi n'urwangano. Ni ngombwa kuri iyi ngingo gutanga igitekerezo kiboneye kugira ngo hatabaho kwitiranya no kuvangavanga mu bya politiki.

Nibaza niba nyuma y'iriya myivumbagatanyo, nyuma ya ririya hindura, ryagiye mu mateka, y'ishingiro ry'ubutegetsi, kuva muri 1959 kugeza muri 1962, imibereho y'abahutu itarahindutse. Niba kuri bamwe, iyo myivumbagatanyo isa n'aho itageze ku ntego nk'uko yari yabyifuje, n'uko nta na busa bumvise. Nta yindi myivumbagatanyo yo muri ubwo buryo izongera kubaho na busa, kuko imiterere ya politiki itakiri kandi itazongera kuba imwe. Kuba intambara ya politiki itakiri imwe nabusa, ni ngobwa guhindura imikorere. Ni ngombwa kugira imitekerereze ya politiki mishya.

Ni ngombwa kandi kwemera ko, n'ubwo habaye amakosa mu mikorere, iyo myivumbagatanyo yarabaye kandi ntaho ihuriye n'"itsembabwoko", ahubwo ni intambara yo kubohoza abahutu ku gasuzuguro n'ubuja. Iyo mpinduramatwara yagize icyo igeraho gishimishije : Repubulika y'u Rwanda. Igihe kirageze cyo kurwanya iyo ndwara yo kubona gusa ibyapfuye, amarorerwa gusa mu bihe byashize. Bizaba ngombwa se ko kandi abahutu bipakurura ingoma "ntutsi" mu yindi myivumbagatanyo ? Bizaba ngombwa se ko abatutsi barwanya abahutu kugira ngo aba nabo batabambura ubutegetsi ? Ni ukudashyira mu gaciro ku batutsi batsimbaraye ku bya kera kwemera ko abahutu iteka bibesha mu byo basabaho uburenganzira. Kandi n'abahutu b'intagondwa bemera ko abatutsi ntacyo bafite kuburanaho uburenganzira mu Rwanda, igihugu cyabo bwite. Iyo migirire igomba guhinduka, ahubwo igihe cyararenze cy'uko yahinduka.

Nzarwanira ibitekerezo, bitari ukurengera igice mu rwego rw'igihugu kuko ari abahutu cyangwa abatutsi ari abana b'u Rwanda. Nzaharanira ko abantu bagira amahirwe amwe, kugira ngo urushije abandi atsinde. Nzaharanira impamvu, ni ukuvuga, kurwanya akarengane n'isuzugurwa ry'umuntu ku wundi.

Ku bwanjye, ni ubushake bwonyine bwo guhuriza hamwe bushobora kuvanaho burundu impamvu zo gutandukana bidafite icyo bimaze no kwicamo uduce, bigenda bigaragara uko ubutegetsi buriho bugenda bushinga imizi, bushingiye ku ngufu z'ingabo z'igihugu, bivuzwe ukundi mu yandi magambo hakoresheswe imbaraga, kugira ngo gihugu hasubireho ubutetsi bw'agatsiko k'ubwoko bw'abatutsi bahoze hanze kera. Ndwanya ihezwa ry'abandi banyarwanda rikorwa n'ubutegetsi buriho, hatitawe ku gice cy'abatuye mu gihugu cyangwa bahuje imibereho.

Abanyarwanda barashaka gutegekwa ku bundi buryo. Barashaka kuyoborwa badatinya ubutegetsi. Barashaka gutegekwa n'abagore n'abagabo bemera ubutumwa bahawe kandi biyemeje gusubizaho ubutegetsi bugendera ku mategeko, kubagarurira icyizere no kwiringira kugira ngo bahangane n'ibibabangamiye.

Abanyarwanda barashaka kumva ubushake nyabwo bwo kwiyunga mu nzira ya politiki no kw'isonga y'ubutegetsi bwa Reta, umurego mu myifatire mu nzego zose za politiki, ubushobozi no no gutunganya ibyo ushinzwe ku nzego zose z'ibikorwa mu gihugu.

Twagombwe guha agaciro ubushobozi, kudahemuka, kuba inyanya mugayo, gukunda igihugu no kubaha abandi mbere yo gutekereza ubucuti mu bya politiki, ibiryango, "ubwoko", n'akarere. Ni ngombwa kuba warateye imbere mu bitekerezo no mu bya politiki kugira ngo uyobore Abanyarwanda barangamiye ubumwe, amahoro n'igihugu gitera imbere.

Abanyarwanda barifuza ihinduka ku buryo butigeze bubaho. Ni amashyaka yizeza ipiganwa mu matora nyayo ashobora gukora iryo hinduka. Abanyarwanda baciye akenge bihagije kugira ngo bamenye gutandukanya ikibi n'icyiza, urumafu n'ingano.

Abayobozi b'amashyaka ya politiki ntibagombye kuvanga ibintu ku byerekeye "bunyarwanda" bwa bamwe, ku "buhutu" cyangwa "ubututsi" bw'abandi, iyo babwira Abanyarwanda. Icyo bo bakeneye ni porogaramu mpinduramatwara, gahunda iboneye, ifite intego zigaragara n'uburyo bwo kuzigeraho. Abayobozi ntibagombye gupfurika cyangwa gupfobya ibyabayeho mu mateka. Ni ngombwa ahubwo kubihesha agaciro, bakabyemera nk'aho ari ibyabo bakabigaragaza aho kubikoresha nk'uburyo bwa politiki bwo guheza abandi cyangwa se nk'intwaro simusiga yo kwiba ubutegetsi ubutagira iherezo.

Ibyabaye ku bahutu n'abatutsi ni ibintu byagiye mu mateka yacu. Tubyemera dutyo. Ariko ibyo byabaye ntibyagombye kuba impamvu yo gutera ubwoba abaturage ugamije kugenzura ubutegetsi mu Rwanda. Ahubwo ni ngombwa guha abaturage amahirwe atuma bihitiramo abayobozi, mu mucyo.

Ubungubu ikibazo si uko umuhutu cyangwa umututsi baba ku butegetsi. Tuzi agaciro kabo, ak'uyu kimwe n'ak'uriya, n'icyo bombi bakoze mu marorerwa yaranze igihugu cyacu. Icya ngombwa ni ugukora ku buryo umupapa, umumama n'abana babona icyo kurya bihagije none n'ejo. Ko ubuzima bwabo, umunezero wabo, n'uburere bw'abana babo buba bushinganye.

Ibyo byose bigomba gukorwa hari umwuka w'amahoro, w'umutekano n'ubusabane hagati y'abanyarwanda.

Muri iki gihe ni ngombwa, kurusha ibihe byashize gushira imbere gahunda y'ubukungu iboneye, ishyigikira abaturage bo mu cyaro. Ni ngombwa kwirinda kurenza ingego y'imari ya Reta iterwa na gahunda zidafite icyo zimaze, umwenda wazo wazabera umuzigo ukomeye abana bacu.

Tugomba gukomeza kurwana muri Kongo ? Oya. Nshyigikiye ivanywa burundu ry'ingabo zose muri Kongo n'ihagarikwa ry'inkunga yose ihabwa abarwanya ubutegetsi bwa Kongo.

Nshyigikiye amasezerano y'i Peretoriya, yashyizweho umukono mu mpera za Nyakanga 2002, n'u Rwanda na Kongo. Kubera ko ngo intambara yishakira amafaranga, iyo ntego n'icyo yaba ihishe, ntacyo imaze. Ni ngombwa kugira imishyikirano n'abavandimwe bacu bo muri Kongo, kugira ngo dushake mu mahoro ibisubizo ku bidutandukanya, niba bihari koko.

Ni ngombwa gutandukanya abanyarwanda bafite intwaro n'abanyarwanda b'impunzi bari muri Kongo. Aba bo bakwiye kurindwa n'amahanga, niba badashaka gusubira mu gihugu cyabo baturutsemo. Ni icyo bahisemo gikwiye kubahirizwa. Ku rundi ruhande, abiyemeza gusubira mu gihugu cyabo, ibyo ntibyagombye kwishingirwa gusa ku mpunzi ziri muri Repubulika Iharanira Demokarasi ya Kongo, ahubwo no ku mpunzi zose z'Abanyarwanda ziri mu bindi bihugu bya Afurika (Kongo Brazavirre, Repubulika ya Afurika yo Hagati, Afurika y'iburasirazuba n'iyo mu majyepfo, mu Burayi no muri Amerika ya ruguru…).

Abasore benshyi bafite impamyabumenyi bibera hanze y'igihugu ariko icyifuzo cyabo gikomeye ni ukugaruka mu gihugu cyabo, bagatanga umuganda wabo mu majyambere mu by'ubukungu no mu mibereho myiza y'abaturage. Gahunda y'ubukungu ifatika kandi iboneye isaba na none politiki ihamye kandi idahindagurika kugira ngo nabo bagaruke. Ni ngombwa gushyiraho ibya ngombwa bisanzwe by'umutekano, bishingiye ku mahame yo kwishyira ukizana, amahame ya demokarasi, kugira ngo atari abasore gusa ahumbwo n'abashesha akanguhe, aho bari hose, bashobore gutaha mu gihugu cyabo aho bazashobora gupiganwa n'abandi basore basigaye mu Rwanda. Iryo piganwa ryubaka ntawarirwanya ahubwo ni iryo gutera inkunga kubera akamaro bifitiye igihugu cyacu.

Ni ngombwa guteza imbere inguzanyo z'amabanki ku bacuruzi baciriritse, ariko kandi hakongera gusuzumwa amategeko ya gasutamo iy'amahoro n'imisoro. politiki y'ubukungu, igira abo ihitana mu mwanya wo kugira abo igirira akamaro, yagombye kurwanwa, kuko idakorera inyungu za benshi mu baturage ahubwo agatsiko gato k'abo baturage. Amaherezo ya gahunda y'ubukungu igomba kuba amajyambere ya buri muturage abakorera imishahara n'abanyeshuri bakomoka mu bakene n'abanyacyaro, aborozi, abasore bakomoka mu cyaro no mu miji, abahinzi borozi, abakozi ba Reta, abanyabukorikori, bose bakeneye guhumurizwa nyabyo ku bihe biri imbere, hashimangirwa umusaruru, ukwidagadura, cyane cyane umutekano kuri bose. Ibi ni ishingiro y'amajyambere y'igihugu cyacu.

Abayobozi bacu b'ubu bateje imbere imibereho y'uduce tumwe tw'abaturage twahungabanye, nk'impfubyi, abapfakazi, n'abacitse kw'icumu muri rusange, ariko ntibitaye ku baturage bo mu cyaro ubungubu basa n'abatereranywe.

Uko ibintu biteye mu Rwanda birasaba gahunda rukomatanya, irenze imvugo ya nyirarureshwa ya Perezida wa Repubulika, guhindagura imibare kwa Minisitiri w'Imari n'Ubukungu n'ibitangazwa na Guverinoma y'u Rwanda. iyo migambi yagombye gusaba ibitekerezo by'ibyiciro byose bigize abaturarwanda.

Amavugururwa ni ngombwa kandi agomba kugibwaho impaka ku buryo burambuye, kugira ngo umubare munini w'Abanyarwanda ugiremo uruhare mu byemezo byerekeye ayo mavugururwa. Urwo rwego rwatuma hahuzwa impuguke mu by'ubukungu, mu by'imibereho myiza y'abaturage, mu bucungamari, mu buhinzi, mu by'uburezi, n'abahagarariye imiryango itagengwa na Reta yo mu gihugu, abahagarariye abashoramari ku nzego zinyuranye n'abikorera ku giti cyabo mu mirimom inyuranye, kugira ngo habarurwe umutungo kamere w'igihugu, hagaragazwe ibikenewe kandi hagenwe uburyo bwo kugera ku ntego zaba zagenwe.

Mu rwego rwa politiki, nemera nkomeje ko ari uburenganzira kamere ku munyarwanda wese yo kwinjira no kuba mu ishyaka yihitiyemo. Igihe kirageze ko Abanyarwanda bakwipakurura umuco w'ishyaka rimwe rukumbi bahatirwa kugira ngo bakorere inyungu z'agatsiko n'abagize "akazu";

FPR ntishobora gusimbura MRND nk'ishyaka rimwe yiyoberanya mw'"Ihuriro ry'amashyaka" (FORUMS DES PARTIS) hanyuma ngo turekere aho. Abanyarwanda bose, udakuyemo n'umwe, bagezweho n'imigirire mibi, mu gihe cy'itsembabwoko, y'abakamiwe n'ingoma y'ishyaka rimwe, M.R.N.D. Ntidushobora kwemera ko ishyaka rimwe rukumbi ryongera kubaho, tuzi ingaruka mbi ibyo bibyara, iyo hashize igihe kirekire, ku bihe bizaza by'igihugu cyacu.

Kwemera ko imikorere nk'iyo yongera kubera ko dufite ubwoba bwo gupfa byaba ari ukugambanira abapfuye bose bazira ibitekerezo byabo bya politiki intambara ni imwe kandi igomba gukomeza kugera demokarasi itsinze. Ni ngombwa gutsinda ubwoba.

Dushobora dute, mu mutuzo usesuye, gukina politiki mu mucyo igihe tuzi ko uwahoze ari Perezida wa Repubulika y'u Rwanda, ukomoka muri FPR, umufasha we wa hafi, ukomoka mw'ishyaka rya PSD n'umunyamabanga mukuru wa MDR bafungiye i Kigali kubera ibitekerezo byabo ku mivugururire ya politiki mu gihugu.

Ubutegetsi bwa FPR bugomba kubarekura nta mananiza abayeho kugira ngo bakomeze ibikorwa bya politiki, batagombye gupfukamira uwo ariwe wese.

Amashyaka ya politiki yose, harimo na FPR, yagombye kubahiriza "AMATEGEKO AGENGA IMYIFATIRE MWIZA MURI politiki" yashyizweho n'amasezerano y'Amahoro ya Arusha, amategeko ari mu bigize Itegeko-Ngenga.

Umushinga w'Itegeko-nshinga, usuzumwa ubu ngubu kugira ngo uzacishwe mu matora ya Kamarampaka, wagombye gusubikwa kugeza igihe uzagirwaho impaka zirambuye mu rwego rusa n'urw'Inama y'Igihugu yisanzuye (Rukokoma). Naho ku byerekeye amatora, yagombye kuba ari uko amashyaka ya politiki yemerewe gukora ku mugaragaro adatinya gukomwa imbere ku ngufu za Reta. Ariko kandi ku rundi ruhane, aramutse agombye kuba mu buryo n'umwuka byateguwemo n'ubutegesti buriho, byaba ari uburyo buziguye bwo kwongera inzibacyuho ho imyaka itanu.

Uruhare rw'amahanga, atanga amafaranga yo gutunganya amatora mu Rwanda, rufite umwanya w'ibanze. Amatora azaba nyuma y'urutonde rw'amarorerwa n'inzibacyuho imaze imyaka 9, agomba kuba mu mucyo. Amahanga agomba kubanza kureba ko ubutegetsi bw'i Kigali bwujuje ibyangombwa kandi bwishingiye umutekano wa buri muturage kugira ngo ayo matora, azerekana igitekereje abaturage bacu mu gihe kiri imbere, ntabyare andi marorerwa mu gihe cya bugufi cyangwa cyegeyeyo.

Ni ngombwa rwose ko, uko ibintu biteye, bihinduka. Kandi ntibyahinduka byerekeza heza igihe abaturage bose bo mu gihugu n'abari hanze batazagira uruhare mu mishinga y'ingirakamaro kandi ngombwa kugira ngo Umuryango wabo ugende neza. Icyo nemera ni uko u Rwanda ruciye akenge kugira ngo rwibohore ububi buva muri politiki kandi rukaba igihugu kigendera ku mategeko. Ni ngombwa ko icyo gihugu kigendera ku mategeko kijyaho, kuko nta piganwa mu matora ririho. Ni ngombwa kwemera ku gahato ipiganwa mu matora no kwanga ibyo gukoresha imbaraga no kuyobya abantu mu kinyoma, aribwo buryo bukoreshwa n'ubutegetsi buriho kugira ngo burambe. Imyaka 10 hafi y'Ubutegetsi butavugirwamo, iyo irahagije.

Niba dushaka kubaka u Rwanda rushya no gutegura ibihe bizaza ku bariho n'abazaza, ni ngombwa guharanira ko ibyumvikanweho Arusha byari bigamije igabana ry'ubutegetsi mu gihe cy'Inzibacyuho, imaze imyaka 9, n'igihugu kigendera ku mategeko aho uburenganzira, ubutabera na demokarasi ari byo shingiro ry'inzego z'ubutegetsi zihamye. Ni koko Itsembabwoko mu Rwanda, ibyaribanjirije n'ingaruka zinyuranye, byashegeshe imibereho y'abaturage kandi isenya imiryango yacu. Ariko na none, ntagitangaje nko kubyifashisha kugira ngo uhambe burundu ibiranga byose Repubulika. N'ibyagezweho bishimishije mu mishyikirano y'Arusha biri mu Itegeko-nshingiro. Hatabayeho kugendera ku mategeko, ntihabaho ukwishyira ukizana, cyangwa ubutabera, nyuma yabyo rero nta majyambere mu by'ubukungu, no mu bya politiki y'igihugu cyacu.

politiki y'amajyambere itirarira, igiye umurongo umwe kandi ishobora gushyirwa mu bikorwa. Ibyo bizasaba mu rwego rw'amavugururwa mu by'ubukungu no guhamya demokarasi, ugukunda igihugu n'ubushake bwa politiki, kudatinya, kwitanga, kutarambirwa mu bikorwa kugira ngo ubitunganye kandi ubigereho, guhangana n'ibura ry'imirimo ku rubyiriko mu cyaro no mu mijyi, ukubura imirimo y'abakibona impamyabumenyi vuba, agahinda k'abacuruzi, abato n'abaciriritse, ubu bakeneshwa n'ibyemezo bihubukiwe, ubushobozi buke bwo kwikenura ku bakozi, kwongera no guha umuco ubuzima rusange. Ni ngombwa kugarurira icyizere igice cy'abanyacyaro no gushishikariza amashyirahamwe mu tugari (amakomini) tw'igihugu cyacu.

Kugira ngo haze amahoro arambye mu Rwanda kandi imibereho myiza y'abaturage barwo itere imbere ku buryo bugaragara, iby'ibanze ni ugutekereza no gushyira mu bikorwa ibintu byatekerejweho bihagije, bikubiye ku nshingabo z'ibanze zikurikira :

Muri gahunda yanjye, ndizera kuzabona umwanya wo gutanga ibisobanuro birambuye kuri izi ngingo zibanza. Nshobora kwemeza hakiri kare ko kurangiza ziriya nshingano zose bisaba ingufu za buri wese. Izo ngufu zizaba ngombwa niba tutacyifuza kuba mu gihugu kirangwa n'ubushyamirane budashira kandi bumena amaraso, aho kwicamo uduce no gutakaza ubuzima bw'abantu byaba mu mateka gusa.

Tugomba twebwe abanyarwanda, tugomba gushyira umukono kuri kontaro nshya. Iyo kontaro y'ubwizerane hati y'ibice byose bigize igihugu cy'u Rwanda izatubera intango nshya yo kongera kubaka igihugu cy'amizero ku bazaza. Ni ngombwa gusezerera ubwoba, urwikekwe mu banyarwanda, bose uko bari bategerejwe n'ubuzima bumwe. Tugomba gusezerera "irondakoko" ridafite aho ishingiye mu Rwanda, gusezerera ubutegetsi bw'igitugu no gusubizaho amahame ya demokarasi, kurwanya umuco wo kudahana no guhanya ukwishyira ukizana-nshingiro mu gihugu kigendera ku mategeko.

Ingoma ya FPR, iri ku butegets kuva muri 1994, imaze kwipima hafi imyaka 10. Yagize igihe kugira ngo isubiranye umutekano ari mu gihugu imbere, ari no ku mipaka yacyo. Yagize n'igihe cyo kumvisha abashoramari ari abo mu gihugu cyangwa abanyamahanga Icyo gihe kirahagije birambuye ku ngoma ya FPR yo kuba yaratekereje ku bibazo bya politiki, by'imibereho myiza n'iby'ubukungu no kuba kandi barashyize mu bikorwa imishinga imwe n'imwe ikomeye mu bice bimwe by'ubuzima bw'igihugu. Niba ntacyashobotse gukorwa mu bice byinshi byihariye by'ubukungu, nko mu by'ubuhinzi, no gutera imbere mw'ishingwa ry'amashyirahamwe mu cyaro, ni ukubera ubushobozi buke mu byo gucunga ibintu aho kubera uko ibintu biteye by'igihe gito cyangwa se bihora..

Amahanga agomba gutera inkunga abanyarwanda kugira ngo batunganye umurimo wabo wo guhindura ibintu mu nzira ya demokarasi mu mutuzo n'umucyo. Igihe kirageze kugira ngo ayo mahanga agizwe n'ibihugu bigendera ku matwara ya demokarasi, cyo gusezerera ibyo kurebera, no gusezerera ubutegetsi bw'igitugu mu Rwanda no muri Afurika. Inkunga yayo mu gutunganya kw'amatora ari imbere ya Perezida wa Repubulika n'abagize Inteko ishinga amategeko mu Rwanda, nk'uko amaze kubigaragaza ku buryo bushimishije muri Kenya, bizabera ikimenyetso cyo kwizera ibindi bihugu by'umugabane wa Afurika.